شیخوپورہ بلدیہ شیخوپورہ کی نقشہ برانچ میں کرپشن اور گھپلوں کے سکینڈل کے بعد انکشاف ہوا ہے کہ نقشہ برانچ کی کچھ کالی بھیڑیں درخواست دہندہ سے مک مکا کرکے شہری آبادیوں میں کمرشل پلازوں کے من مرضی کے نقشے جاری کررہی ہیں۔ تنگ گلیوں میں کئی کئی منزلہ پلازے کھڑے ہونے لگے ہیں جس سے نہ صرف لوگوں کا گلیوں سے گزرنا مشکل ہوگیا ہے بلکہ چادر اور چاردیواری کا تقدس بھی پامال ہورہا ہے اور شہریوں کو شدید پریشانی کا سامنا ہے۔محلہ نبی پورہ میں میاں عمران نے آباد ی میں تعمیر کئے گئے غیر قانونی پلازے کی پارکنگ کا گیٹ گلی میں کھول لیا ہے علاوہ ازیں سیڑھیاں اور شیڈ بڑھا کر آدھی گلی پر قبضہ کرلیا اور گلی کے رہائشیوں کی زندگی اجیرن کردی ہے۔دوسری منزل کی کھڑکیاں اور دروازے بھی گلی کی طرف رکھنے سے ارد گرد کے گھروں کاپردہ ختم ہوکر رہ گیا ہے۔خواتین نقاب کے بغیر اپنے گھروں کے صحن میں نکل سکتیں ہیں نہ گھر کے کام اورصفائی ستھرائی کرسکتی ہیں۔گلی کے رہائشیوں راجہ محمد اکرم،میاں محمد علیم، محمد مکرم ڈھلوو دیگر نے ڈپٹی کمشنر سے اپیل کی ہے کہ ذمہ داروں کے خلاف فوری طور پر قانونی کاروائی عمل میں لائی جائے اور پلازے کی غیر قانونی تعمیر کو روکا جائے۔
